يوميات مستشفى عراقي..الجانب المخفي من توحش المجتمع

ما كتبه المعاون الأداري لمستشفى الشطرة العام على صفحته الشخصية:

الاستقبال الاولي يستقبل حادث طفل سقط على زجاج قطع في العصب والوريد. بعد لحظات حادث دراجة نارية، 5 دقائق حادث آخر لدراجة نارية، وبعد عشر دقائق حادث ثالث لدارجة نارية: 7 اشخاص جروح متعددة و عميقة، وأحد الأشخاص فاقد الوعي وجروح في الرأس.

طبيب الطوارئ أرسل المصاب الى المفراس، بعد لحظات المفراس طلب من الطبيب الحضور هناك كسر وخسف في الجمجمة، الطبيب الآخر في الاستقبال الأولي والطبيب الثالث في غرفته يشاهد الحالات الطارئة البسيطة لكن أمامه خمسين مراجعاً.

قدوم احد المراجعين…وين المعاون الاداري؟!!…تفضل….شوف الازدحام بس طبيب واحد…اي نعم الاخر في الاستقبال والثالث في المفراس يوجد شخص مهشمه جمجمته …المواطن واخوي اشلون بطنه توجعة خو ما انتظر سرة جيبوا اطباء….. عيوني عندنا طبيبة بصالة الولادة وطبيبة بالعمليات ومعها ايضا طبيب يجري عمليات و3 طوارئ بس حوادث وعمليات وانت جاي تشوف بعينك ….المواطن : انتم ماعدكم انسانية!!!! ….مواطن يصيح بصوت عالي وين المعاون الاداري …نعم تفضل ..المواطن : تفضل التلفون هذا مفتش الوزارة …الو ..السلام عليكم …وعليكم السلام ..انا فلان من تفتيش الوزارة …اهلا وسهلا ..حضرتك معاون اداري مستشفى الشطرة الخافر …نعم تفضل…شنو عدكم فقط طبيب الان في المستشفى…الجواب الان عندنا 2 من الاخصائيين جراحة ونسائية يجرون عمليات وطبيبة مقيمة في صالة الولادة تعمل و3 اطباء في الطوارئ واحد في الاستقبال الاولي لوجود 4 حوادث والاخر يمشي الحالات البسيطة والثالث في المفراس لمتابعة شخص لديه كسور في الجمجمة
المتصل من الوزارة شكرا اخي الكريم تحمل المراجع لانه لايعرف الأولوية وحالته باردة الله يكون بعونكم ….

في صالة الولادة ثلاثة توائم ارسلو للخدج وبعدها اثنين من التوأم ارسلوا للخدج يوجد في الخدج أكثر من 30 طفلاَ. شخص يتجول في ممر المستشفى ويقول “ساقطين حراميه كواوييد” ذهب باتجاه الخدج …ذهبت خلفه ..السلام عليكم تفضل اخي ..المواطن اريد اطلع ابني من الخدج …ليش؟؟هواي اطفال داخلين وانا شلون اخليه وي هاي الاطفال شعرف اشبيهم مابيهم …اخي ميصير تخرجه اذا اتريد تخرجه لازم على مسؤوليتك اي اطلع على مسؤوليتي …ومن جانب اخر هناك 30 أو أكثر ينتظرون امام صالة الولادة كل 5 دقائق ياتي شخص.. المعاون الاداري ..نعم تفضل .المواطن زوجتي بصالة الولادة محد الها ولازم اتحولونها للعمليات…. استريح قمت بالاتصال بالصالة مرحبا دكتوره ..ماهيه حاله المريضة ح.م…المريضة تحت المراقبة واجري الفحص لها وخلال ساعة او ساعتين ستكون لها ولادة طبيعية …شكرا على الجواب…بعد دقيقتين مواطن اخر…اتفضل زوجتي بالولادة صار ساعتين اذا صار شي بالطفل احملكم المسؤولية …استريح اخي..اتصال في صالة الولادة…جواب الطبيبة …المريضه س .ع بحالة جيدة وهي على وشك الولادة….بعد 5 دقائق مواطن اخر بنتي بالولادة محد الها ونفس الحالة الاتصال والجواب من الدكتورة مواطن اخر ..اتفضل .. زوجتي اتريد اتجيب وطردونا صاله الولادة …جواب الدكتورة المريضه ع .ج ليس لديها ولادة من المحتمل بعد 3 ايام تكون لها ولادة.

وهكذا يستمر الوضع كل 5 دقائق مواطن يأتي ولحظه اذا بصوت يرتفع “احرك ابهاتهم المستشفى احركه انعل والديهم اذا ماتت بنتي” ..خرجت لأشاهد ماذا يجري في طوارئ الاطفال وجدت 3 ممرضين وطبيب يعالجون في طفلة مشمورة بسبب ارتفاع درجه الحرارة ومعاون صيدلي مسرع لجلب العلاج اهل الطفله مخبوصين ها ماتت ها دكتور هادكتور الطبيب عيوني بس اصبر مابيها شي طبعا كل دقيقه سؤال او بالثواني السؤال خال الطفلة بس هاي هيه الابوها امعود مابيها شي بس انطونا مجال 20 واحد ملتمين خلي انشوف دربنا ….اهل الطفله موهاي عزيزتنا …

بعد لحظات مواطن وين المعاون الاداري …تفضل ممرضه بالاطفال ماعدها انسانية …ذهبت لقسم الاطفال تحدثت الى الممرضة ما المشكلة الممرضه هذا الشخص داخل بالردهة وباقي النساء اتريد ترضع اطفالها وما يقبل يطلع …تحدثت الى المواطن عيني ميصير هاي ردها كلها نساء وانت شاب التريد ترضع النايمه ميصير انت بداخل الردهة ..المواطن وشنو شفتني اباوع عليهن؟!!!! …

انتقلت الى احد الاقسام الاخرى لمتابعة الامور سمعت احد المرافقين يتحدث مع اثنين من المرافقين يقول لهم شوفوا هاي الغرفة بيها موظف وموظفة الموظف جاي ايقنع بالموظفة هسه راح؟؟؟؟؟؟؟؟ طبعا الموظف وزوجته في نفس القسم يداومون الي يحجون عليهم!!! …

رجعت الى قسم الطوارئ في الطريق اشاهد المراجعين يشمرون نفاياتهم على الارض وسلة النفايات تبعد عنهم متر واحد وبعد لحظات حصل انسداد في احد الصحيات توجه له عمال النظافة واذا سبب الانسداد عدد من الحفاظات النسائية على الرغم من وجود سلة نفايات داخل المرافق وفي النهايه كان عدد المراجعين اكثر من 600 مراجع واكثر من 100 مريض راقد و9 احلات خطره بالاسعاف الى الناصرية و20 ولادة و10 عمليات. انتهت اخر عمليه في الساعة الرابعة فجرلً.

هذه هي نبذه مختصرة من خفارة ليلة 7/7/2019

Related Posts

LEAVE A COMMENT

Make sure you enter the(*) required information where indicated. HTML code is not allowed